既好食, 又好玩

每年聖誕節前商家們都推出唔少新商品以增加營業銷售, 尤其是一些應節物品更加「卓頭」十足各出奇謀搶客。其中Tin Biscuits (罐裝餅)在聖誕檔期盡顯威風, 名大品牌都會像車廠一樣年年推出新設計, 齋睇外型已經夠晒爆, 今年仲仲出埋燈光效果, 上鏈音樂盒及旋轉裝置應有盡有, 就係怕你唔夠驚喜, 唔覺得抵食夾大件。近期「馬莎」嘅鐵罐裝奶油酥餅有LED 燈效或上鏈音樂盒都祇係£5一盒誠意十足, 呢個價錢貼近成本價, 我都唔明「馬莎」利潤會有幾多?

ASDA 亦唔輸蝕, 「水晶球」鐵罐裝奶油酥餅配有上鏈音樂盒, 可愛的音樂襯托聖誕場景在上面, 無論送禮或自用都非常合適。Home Bargains則推出立體搖擺聖誕人物鐵罐曲奇餅, 合力搶攻兒童市場。一共五款, 就算有五個小朋友都可以一人一隻唔駛爭。

除咗「鐵罐裝奶油酥餅」外, 另一款要介紹就係可愛嘅「聖誕人物棉花糖」, 在寒冷的冬日或夜晚, 一杯濃郁的朱古叻熱飲裡再加上棉花糖, 經融化而產生的輕盈奶油味, 完美提升朱古叻熱飲的厚度和豐富度。何況趣緻的「聖誕人物棉花糖」就算簡單地用牙籤戳起做擺設, 亦可以增添室內不少節日氣氛。